Uganks dëst Joer hu mir déi zweet Phas vum Projet FieldgenGoesSolar lancéiert an d’Luana, eent vun eise Schüler, déi eis dës Kéier begleet hunn, huet seng Erfarungen an der Schülerzeitung Trait d’union gedeelt.
Et huet alles ugefaange mat engem 18-Stonne-Fluch den 29. Mäerz. No enger dräistënneger Faart queesch iwwert d’Insel Cebu sinn eis Fräiwëlleger schliisslech un hirem Ziluert ukomm: d’Municipality Daanbantayan um nërdlechste Wupp vun der Insel. Bal ee ganzt Joer hu si op dëse Moment gewaart.
Eis Zesummenaarbecht mat der École Privée Fieldgen erlaabt et enger Grupp vu fräiwëllege Schüler a Proffen, eis an d’Regioun ze begleeden. Se ginn an enger Rei Workshoppen am Viraus op d’Aarbecht um Site preparéiert. Op Cebu hëllefe si eis dann derbäi, den Terrain virzebereeden an d’Solaranlagen a Stéit ze installéieren, déi net un d’Stroumnetz ugeschloss sinn.
Leider ass den Zougang zu Stroum fir vill Famillen an eisem Aktivitéitsgebitt och haut nach entweder onméiglech oder riichteraus onerschwénglech. Dat féiert dozou, dass Luucht zu engem Luxusgutt ginn ass. “Si schaffen dohanne vill mat Kerosin fir Luucht ze kréien, wat immens geféierlech ass fir hir Gesondheet”, zielt d’Luana a sengem Rapport. Wärend dem Openthalt am Fréijoer war et eiser Ekipp méiglech, 17 Installatiounen ofzeschléissen. “Déi Freed an hire Gesiichter, soubal si Stroum haten an d’Luuchte funktionéiert hunn, ass e Bild, wat ech ni vergiesse wäert a wat mir richteg bewosst gemaach huet, dass dat net selbstverständlech ass, Stroum am Alldag ze hunn”, sou eis Volunteer-Schülerin weider.
Ee wichtege Pilier vu FieldgenGoesSolar besteet aus dem interkulturellen Echange tëscht eise fräiwëllege Schüler an de Leit aus der lokaler Communautéit. Zesummen hu mir eis d’Insel méi genee ugekuckt an eis ënnert d’Leit gemëscht. Mir hu Mäert a Stied besiichtegt, hunn eis mat usässege Studente getraff a si vill iwwert d’Liewen op de Philippinne gewuer ginn. A sengem Artikel, deen am Trait d’union verëffentlecht gouf, ënnersträicht d’Luana den immense Kreativitéitssënn vun de Leit, deenen hatt wärend sengem Openthalt begéint ass. “D’Leit sinn och immens sozial a léif dohannen”, deelt hatt senge Lieser mat, “si wénken engem ëmmer zeréck, wann een hinne wénkt, och wann ee sech net kennt.”
Eis Ekipp huet hir Rees um Instagram-Account vun eisem Projet dokumentéiert a si mat neie Fäegkeeten an Erfarunge vun de Philippinnen zeréck komm. Wat d’Luana ugeet, sou huet hatt eng ganz nei Perspektiv vum Liewe kritt. Hatt huet geléiert, “dass ee wierklech soll wäertschätzen, wat een huet, an dass een net alles soll als selbstverständlech unhuelen.” D’Participatioun un dësem Projet verbënnt hatt mat ganz villen Impressiounen, déi hatt ganz no bei sech dréit. “Zesummegefaasst”, mengt hatt a sengem Rapport, “war et eng onvergiesslech Erfarung.”
FieldgenGoesSolar ass Deel vun eisem Projet WeGoSolar, dee mir an der ländlecher Regioun Daanbantayan duerchféieren.
